كيك رولي بالشكلاط بكريمة بنينة و اقتصادية 😋😋

 

كيك رولي بالشكلاط بكريمة بنينة و اقتصادية 😋😋

مقادير كيك رولي بالشكلاط:

3 بيضات
20 غرام سكر
100 غرام دقيق
ملعقة كبيرة بودرة الكاكاو
خمارة
مقادير كريمة كيك رولي بالشكلاط:
نصف رابعة زبدة
3 فرماجات
3 ملاعق كبار سكر صقيل
 نصف رابعة شكلاط أبيض (أو أسود)

طريقة تحضير كيك رولي بالشكلاط :
نوجدو الكيك، نطربو البيض مع السكر مدة 10 دقايق حتا يتزاد فالحجم ديالو،
نخلطو الدقيق مع الكاكاو و الخميرة
و نزيدوهم علا البيض و السكر اللي طربنا و نخلطو مزيان حتا يتجانس لينا الخليط،
نديروه فلاطة مستطيلة مدهونة بالزبدة و الدقيق (او مفرشة بالورق الشفاف) و نوزعوه مزيان،
ندخلوه للفران يطيب مدة 15 حتال 20 دقيقة، لما يطيب لينا الكيكة نخرجوها،
نغطيوها و نخليوها تبرد مزيان
نوجدو الكريمة، نطربو الزبدة مع الفرماج حتا يتجانس لينا الخليط،
نضيفو السكر الصقيل ملعقة بملعقة و حنا تانطربو مزيان حتا نكملو الكمية،
و أخيرا نضيفو الشكلاط أبيض اللي خاصنا نكونو ذوبناه
و نخلطو مزيان و ها هي الكريمة واجدة
ناخدو الكيكة نحيدوها من اللاطة و نديروها فوق ثوب نقي
ندهنوها كاملة بالكريمة،
نروليوها بشوية باش ماتهرسش لينا
و نزينوها بالكريمة و الشكلاط
كما هو واضح فالصورة أو حسب الرغبة،
 وهاهي كيك رولي سهل بالشكلاته نقدموها بالصحة و الراحة.